القمر بضيعتنا
القمربضيعتناأحلى بيضوّي كتير
عالخرنوبة الغفيانة ع كتف الشير
بيطلع وبيسهر معنا لطلوع الضّو
وشويّ شويّه بيكبرويعود صغير
الصّبح بضيعتنا لمّا بيوعا بكير
الشمس بتصحا ع مهلا مع العصافير
وبتمد خيوطا الصّفرا فوق التلاّت
وبحنّيه بتفيّ عا الحواكير
وسواقيها وميّاتا بتروي العطشان
كروما الخضرا وحرشاتا وهوا الوديان
رفوف حجال وشحرور..وفرّي وسمّان
كلما الصيّادي تقرّب… هيّ بتطير
لما بمشي ع دروبا بحسّ بأمان
وبتذكّر كل الماضي وأيّام زمان
وبتذكر أمي وبيّ بين الوديان
الحقهم متل خيالن وبخاف كتير
أمي ترندح موالا وتصيح الاوووف
والغيمات ال بالعالي ورفوف رفوف
ويردّ الصّوت الوادي وموت من الخوف
وبييّ ع كتفو الصّمد وبِ إيدووو النير
مافي أحلى من الضّيعه لو صغت حروف
لو درت الدنيا كلاّ أحلى مابشوف
يا رايح عاضيعتنا بتعمل معروف
سلملي عليها وقلاّ اشتقتلا كتير
احمد شعبان
ليست هناك تعليقات:
إرسال تعليق